أسماء الممثلين
الفصل الأول
الفصل الثاني
أسماء الممثلين
الفصل الأول
الفصل الثاني
الخدامين والمخدمين
الخدامين والمخدمين
تأليف
محمد عثمان جلال
أسماء الممثلين
البيك:
المخدوم.
الحاج سالم:
مخدم تمن باب الشعرية وإبراهيم صبيه.
خدامين:
سيد وأحمد.
اثنين حمارة.
جملة خدامين.
فرغلي:
مخدم تمن الموسكي.
الفصل الأول
المنظر الأول (البيك المخدوم، والحاج سالم المخدم، وصبيه ابراهيم)
البيك :
يا حج سالم أنا أقريك السلام
إنت اختيار صالح كمان راجل تمام
اعمل معي معروف وخليك مستوي
وانضر لنا سقا يكون راجل قوي
يطلع القربة ويكلف لي الحمار
وياخد المقطف يجيب لحمة وخضار
لكن أنا بدي الأمانة يا جدع
ولا أحب الزور وأفعال البدع
ومرحبا بك في جميع ما تطلبه
بس انت ساعدني على اللي أرغبه
الحاج سالم (لصبيه إبراهيم) :
ده يا إبراهيم انده لأحمد أو علي
وإن كان غايب هات عمك فرغلي (ويقول للبيك):
والا أجيب سيد لأنه واد نضيف
في كل مشوار تبعته تلقاه خفيف
وإن كان في شبره والا مهمشه
تشيعه المغرب يجي قبل العشه
يستنضف اللحمة ويعرف في الخضار
وإن قلت له طير يا جدع في الجو طار
وتعمله قواس والا بلطجي
ويعمل القهوة وأبوه كان قهوجي
البيك :
وعند مين دا كان خدم يا هلتره
كان عند راجل يا ترا والا مره
الحاج سالم :
كان عند ابوه في خدمة القهوة صبي
بعدين فتح زيات عند الإتربي
يا دوب خمس تشهر على بيع الشكك
أما زباينه كلهم كانوا شرك
أكلوا عليه المال وهو لاخر أكل
راح سلم المفتاح وللدكان قفل
جاني على القهوة طلب خدمة قوام
جت قسمته والعيش عند الشيخ إمام
البيك :
وليه خرج من عند دا واش لو سبب؟
الحاج سالم :
أمر المشايخ في الخدامة دا عجب
بقا أقول لك على السبب وأخبرك
وأفطنك عللي حصل وأنورك
لما دخل سيد ببيت الشيخ إمام
قعد يبين له الحلال من الحرام
ويقول استنجى وتوضا وقوم
صلي وخلي للصلا بدلة هدوم
وإن كان للخدمة أهي الخيشة منه
والبير اهيا الحمد لله عندنه
وتغسل الحوض الكبير وتبخره
وفي الكنيف لبريق ديما تحضره
وعندنا القربة وعندنا الحمير
تملا لنا القربة من البحر الكبير
وتروح للجامع تجيب ستين رغيف
لكن تنقيهم من العيش النضيف
وكل يوم تبيع لنا العيش القديم
ويكون معك في السوق عبد الشيخ سليم
وكل شيء تسلمه لي بالعدد
اوعى يغشك حد في السوق يا ولد
طهق من الخدمة وكتر المرمطة
والشيخ دا لاخر يحب المظرطة
قوم يا ولد هات الجراية وعدها
ونضف البغلة قوام وشدها
ويطخخه مشوار التمن السيدة
من شان عزومة وكل يوم على كدة
حتى انبرى عظمه وجسمه اتنحل
كان اتولد لا شك في طالع زحل
أدي السبب أما الولد قوي صليح
ويختشي العيبة وفي الخدمة مليح
البيك :
وبعد ما فات الإمام راح عند مين؟
الحاج سالم :
أخده يهودي اسمه الخواجة بنيمين
زعل من السيرج ومن بيض الفراخ
وخاف ينصاب بالعمى ولا النفاخ
يا دوب تلت تشهر قعد عنده وفات
لو كان فضل شهرين كماني كان مات
البيك :
بعد اليهودي يا ترى مين جا خده
والا فضل زي الحمار في مدوده
الحاج سالم :
جاني أبو حمزة وهو شيخ دهمشه
وكان مجوز مرة في مهمشه
وكل يوم يطخخه مشوار كبير
وهو على الرهوان وعامل لي أمير
وصار يروح الغيط يشقر علدره
فوق الحصان والواد يجري من وره
والأكل من بتاو واسمه حندويل
أما الغموس من مش فيه الدود طويل
وإن غلط ليلة وكان عنده طبيخ
تكون بصارة أمر من ماء الفسيخ
والا جمل عيان والا طور فطيس
مللي يكون موجود في سوق الخميس
ما صدق إنه يوم مع سيده حضر
جاني وقال ما فيش في عينك نضر
ما عدت أروح لا عند دا ولا عند ده
هوا تقصد بخت والا عند ده
أهو جا ... ... ... ...
المنظر الثاني (الحاج سالم، والبيك، وسيد الخدام)
الحاج سالم (لسيد) : ... بوس إيد سيدك يا ولد
أحسن من اللي كنت عنده في البلد (سيد يبوس إيد البيك ويقف.)
البيك :
لك أب؟ ... ... ... ...
سيد : ... ... أبويا مات ... ...
البيك : ... ... ... ... وأمك؟ ...
سيد : ... ... ... ... ... ميتة
البيك :
وفين حوايجك؟ ... ...
سيد : ... ... كلها مشلتتة
البيك (للمخدم) :
يا حج سالم خد جنيه وروح معه
واحفض كلامي اللي اقوله وتسمعه
سوق المؤيد فيه قمصنجي شهير
اسمه عمر وله هناك مخزن كبير
هات له قميص ويا لباس وعنتري
وبعد ما تقبض فلوس وتشتري
ارجع معه واديني بستناك هنا
أعطيه أنا جزمة من اللي عندنا
وأديه كمان طربوش يغير سحنته
وأشيعه الحمام ينضف جتته (ويروحوا.)
البيك (لوحده) :
أهو بس بصرف في فلوس من غير لزوم
ما أصدق الخدام على الخدمة يدوم
ركه على شهرين ثلاثة وإن شبع
يسمع كلام مخدمه ويتبع
لما يجي ياخد الجعالة يبص له
ومن الكلام اللي معاه يرص له
ويعلمه السرقة ويسقيه العوج
ويقابله في كل يوم إذا خرج
من أجل ما يقسم معه اللي طيره
وإن خرج يجيب زيه يغيره
هي كدا ماشية مع المخدمين
لا مخدمين تصدق ولا خدام أمين
المنظر الثالث (الحاج سالم، والبيك، وسيد)
الحاج سالم :
أهو اشتريت له جلبية علقياس
وجبت له قميص وجبت له لباس
وجبت له بلغة وطربوش مغربي
ودفعت من جيبي ريالين والنبي
فتك بعافية ... ... ... (ويقول لسيد): ... ... وانت خليك مستقيم
في خدمتك والبيك دا راجل عظيم (ويروح.)
المنظر الرابع (البيك، وسيد)
البيك :
قولي انت يا سيد بقا على الصحيح
بلفظك الرايق وقولك دا الفصيح
هو المخدم في غيابي قال لك إيه
على السلوك اللي يريد تمشي عليه
إنت بقيت ابني وصرت في ذمتي
لما أتيت بيتي وصرت بخدمتي
قول علصحيح لا تختشي ولا تخاف
ولا تعاكسني ولا تقصد خلاف
سيد :
قالي لي إذا أعطاك مخدومك فلوس
إن كان ثمن للشمع أو حق الفنوس
والا عطالك تشتري لحمة وخضار
ولا العليق اللي يجيبه للحمار
قربط على خمس الفلوس اللي معك
واوعى تقول حاجة لواحد يسمعك
وإن شيعوك في البيت تجيب شبت أو جرجير
إن كان قليل اللي انطلب والا كتير
اسعى على البقشيش من اللي رحت له
لا بد يعطيك شيء لما تسأله
مع ابنهم إن شيعوك خليك لطيف
حين يدخل الكتاب خد منه رغيف
واغويه على طلب الفلوس وسلطه
لجلن إذا قابل أبوه يورطه
لو قرش تعريفة عطاه خد ملمين
هيا الفلوس أمال تجي تجري منين
وإن اشترى سيدك بنفسه حاجته
اوعى تجيب سيرة والا تحدته
بس انت طير في خشب وفحم كوك
واوعى لنفسك يا جدع لا يمسكوك
وعور القربة وقطع في سلب
وكل يوم اطلع لسيدك في طلب
البيك :
وانتا بقى واجب عليك تعمل كدة
ومين يآمن بس راجل زي ده
سيد :
وليه أنا أعمل كدة غرشي كلام
ما حد يتجاسر كدا الا ابن الحرام
البيك :
قوم انت روح للحج سالم شيعه
بدي على شان أجرتك أحكي معه (فيروح.)
المنظر الخامس
البيك (لوحده) :
أهو من الأول فقسنا لعبته
واظهر لنا النبل الذي في جعبته
ما عدت آآمن له ولا أستخدمه
وأأخره بين الرجال ما أقدمه
المنظر السادس (الحاج سالم، والبيك، وسيد)
البيك :
يا حج سالم خد صبيك واخرجوا
أوعوا بقا في خطنا يوم تدرجوا
أنا نويت اليوم أسافر علبلد
لا لي لزوم خدام ولا آخد ولد
يكفي اللي جبته لي أهو خد كسوته
خده معاك وانصحه وحدته
الحاج سالم :
هوا جرى حاجة؟ ... ... ...
البيك : ... ... ... بقول برا قوام
بلا كباير مصطنع بلا كلام (يخرجوا.)
البيك (لوحده) :
في قهوة الموسكي بشوف خدام كتير
متجمعين كأنهم موقف حمير
ديما أشوف هناك ناس من غير عدد
فيهم برابرة وفلاحين وأولاد بلد
أروح أقابل شيخهم واسأله
وإن عجبني حد منهم أقبله
لا عندنا بواب ولا سقا فقط
نفضل بلا خدام كدا يبقى غلط
لازم من الخدام يشيل قفة طحين
وإذا فضي يغسل مواجير العجين
ويجيب عليقة للحمار وينضفه
ويهز له في التبن لما يعلفه
ويشيل لي المقطف وأروح سوق الخضار
وأشتري على رواقه آخر النهار
الفصل الثاني
المنظر الأول (البيك، وشيخ الخدامين، وخدامين كتير)
البيك (لواحد من الموجودين) :
فين يا ولد شيخكم؟ ... ...
أحد الموجودين : ... ... ... ... أهوا فرغلي
البيك :
وانت اسمك إيه؟ ... ... ...
أحد الخدامين : ... ... ... أنا اسمي علي
البيك (للشيخ) :
يا فرغلي هوا علي سقا مليح؟
الشيخ :
دا بربري لكنه في العربي فصيح
إن كان على سقا أهو أحمد يليق
وينضف الإصطبل ويجيب العليق
البيك :
طيب وكم في الشهر ياخد يا تره؟ (الشيخ يسكت.)
البيك :
ما ترد هو انت بتسمع من وره؟
الشيخ :
روح انت روح وانا أجيبو وآجي
مش بيتكم برضه اللي عند الحلوجي
البيك :
في البرقوقية بالخرنفش بيتنا
طيب ما نقضي دلوقيت وإحنا هنا
بدك أروح وانت بقا تبص له
ومن النصايح والكلام ترص له
أهي المهية أربعين شهري تمام
أنا محبش يا أخي كتر الكلام
ياكل ويشرب كل يوم من أكلنا
وكسوته كل سنا من عندنا
بقاش كلام تاني؟ ... ... ...
الشيخ : ... ... ... أقول لك علصحيح
الأربعين منك شوية مش مليح
خدام وهام سقا وهام سايس كمان
إن كان على دا ليه مبطل من زمان
تلت صنع فيديه كمان ونظلمه
كان من زمان غيرك خده وخدمه
زيده كمان عشرين واسمع كلمتي
حتى شوية دول عليه في ذمتي
ما هش وليد هلس دا راجل تمام
وانتا أمير ما يعجبك كتر الكلام
البيك :
طيب وحيث البيت عرفت تشيعه
والأحسن انك يا أخي تجي معه
المنظر الثاني (الشيخ، وأحمد، والبيك، واثنين حمارة)
الشيخ :
أهلا وسهلا حضرة البيك الأمير (ويشاور على الحمارة.)
اعطي لدول قرشين في أجرة حمير
البيك :
يبقى من الموسكي لهنا تحتاج ركوب
ادفعهم انتا وانكوي لجلن تتوب
دنتا وعم أحمد قوي مشلبنين
منتاش مخدم يا أخي هو انت مين
لكن خد يا عم قرشينك وروح
بكرة بقا ازرعلي جنينة في السطوح
وعمنا السقا أهو يسقي الشجر
أما وقعنا اليوم في كبشة غجر
الشيخ :
تنك لنا طيب تروح أمال لمين
إنتم مش اسيادنا وإحنا خدامين (ويقول لأحمد):
يا احمد اهو اشطر ولا تعطي هوان
والرزق يتيسر إذا آن الأوان
اوعى تقصر بس ساعة فخدمتك
وإن رحت في مشوار قوي همتك
وعلق القربة وإوعى للسلب
أحسن يقولوا دا غشيم والا جلب
واستنضف اللحمة ونقي في الخضار
ونضف الإصطبل من تحت الحمار (ويقول للبيك):
كن في أمان الله ... ... ...
البيك : ... ... ... وانتا في الأمان
بدك تفارق أو تقول حاجة كمان
الشيخ :
بس الجعالة ... ... ... ... ... ... ... بعد كم يوم ابق فوت
هو انت من غير الجعالة راح تموت (الشيخ يروح.)
المنظر الثالث (البيك، وأحمد الخدام)
البيك :
خد دالريال يا احمد وخد مقطف نضيف
هات لي تلت ارطال من الضاني اللطيف
وهات من القلقاس تمن ترطال تمام
واسأل عليه قبلا وشوف رطله بكام
وسلق مع لامون وقرشين كسبرة
وقرش بيض مللي هناك في القنطرة
لكن تعا قل لي على معلمك
بالله قال لك إيه لما كلمك
أحمد :
ما قالش حاجة ... ... ... ...
البيك : ... ... ... قلت لك فض الخلاف
امشي معي دغري وعمرك ما تخاف
أحمد :
ما قلت لك ما قالش حاجة ... ...
البيك : ... ... ... ... ... ... يا جدع
يكفي ملاوعة في الكلام يكفي بدع
يا هلترى إنتا معي والا معه
وان قلت لي عن شيء هو راح يسمعه
ما دام أكلت العيش عندي صرت لي
وصرت زي ابني صحيح انك ولي
مخدمين ايه دول حرامية كلاب
ياكلوا شقاكم ويوروكوا العذاب
نهار ما تقبض يجي ويقطعك
وإن خليت من خدمتك ما ينفعك
قاعد على القهوة ويبدر في كلام
وإن أتاه مخدوم يقريه السلام
واللي يبره بالفلوس يلسعه
ويحب تاني يوم قوام يطلعه
لجل الجعالة كل ساعة تشتغل
ويكتر الطيب ويلعب بالزغل
أحمد :
والله يا سيدي كلامك دا مليح
واللي حكيته كلته برضه صحيح
تعرفش قال لي إيه لما فتنا
نهار ما جيتنا هناك حدتنا
قال اشرط القربة وخد تعميرها
وقطع السلبة وهي فوق بيرها
واسرق الرشمة وهاتها لي هنه
لكن أنا مرضتش وحياة ربنه
واعمل مع الجزار والخضري اتفاق
وامشي عدل في البيت من باب النفاق
وحوش حدا العلاف ربعه من العليق
لكن دي سرقة بمثلي لا تليق
قال لي كمان علبردعة ابن الحرام
والمرتبة اللي تحطها تحت الحرام
قال قطع الإبزيم واهري في الطفر
وقول حمارك جد في عينه ضقر
ودول تصليحهم يعوز فلوس كتير
لكن عرفت ان المخدم دا مكير
وانا بعون الله ما اسمع له كلام
أكلت عيشك والخيانة دي حرام
البيك :
إنتا بقيت ابني كمان قول قال لك إيه
إن كان كلام تاني قوام احكي عليه
القصد اقول دول للمحافظ واعلمه
لاجل ما يجيب له لجام ويلجمه
الخدام أحمد :
قال لي إذا طلعت بالقربة الحريم
وشفت سجادة قديمة أو كليم
قول للصلا في الحوش عندي ينفعم
وإن طلبتوهم قوامك يطلعم
وإن شفت شبشب في السلام طيره
وحين تروح برا قوامك صوره
أما القباقيب اللي ترميها الصغار
خدهم وبيع الكل في آخر النهار
وإن شفت طقطوقة نحاس والا وطا
أو شفت دقية صغيرة لها غطا
في عبك احدفهم وهاتهم لي هنا
أعرف لهم أسواق وأبيعهم أنا
ونحوش الأثمان ونقسمها سوى
وكل داء عندي أراني له دوا
البيك :
شوف اما اقولك انت برضه طمعه
حتى نجيب داغه هنا ونوقعه
وبعدها أروح للمحافظ أخبره
وأعلمه بأمورهم وأنوره
أحمد :
بعدين تجي رجلي ... ...
البيك : ... ... ... أنا أخلصك
وأزودك أجرة ولا أنقصك
بدي أشوف غير دول لكن برضهم
في المكر والتزوير لخرين زيهم
أحمد :
في الدرب الأحمر والصليبة والإمام
من كان مخدم زيهم برضه تمام
قاريين على إبليس أصول البسبسة
ومكررين الشيطنة والأبلسة
وإن كان بدك تشتكيهم للبليس
هناك لا تلقى أنيس ولا جليس
ويحولوك على النيابة بالعجل
وتشوف أمور هناك تقصر الأجل
واللي تقوله في حقهم وتنعته
من غير شهود منين تعرف تثبته
وأنهو جدع خدام على شيخه شهد
إلا ترائيه في خلاصه مجتهد
روح انت علسوق اشتري لنا العشا
وقل لهم في البيت أنا جي العشا
المنظر الرابع
البيك (لوحده) :
لا بد أكتب عرضحال وأقدمه
ومن العمد واهل البلد أختمه
وأترجم القانون اللي في بريز
وأمضي عليه من عند مولانا العزيز
وأخلي كل الخدامين تمشي عليه
هو السكوت منا عليهم بس ليه
وأعمل لهم ديوان مخصوص أو قلم
ويتنصب على السطوح فوقه علم
ونقول عليه قلم عمود الخدامين
يحكم عليهم وعلى المخدمين
واللي يريد يخدم يجيب ضامن غريم
إن كان رجاله والا إن كان حريم
ويدفع المعلوم وياخذ تذكرة
وتنظبط أما اللي حاصل مسخرة
حيث تنتشر لايحة لطيفة موضبة
فيها الشروط موضحة ومرتبة
Página desconocida