محمود :
اوعي تتكلمي ولا كلمة! خلاص أنا كشفتك! عرفتك! عرفت كدبك وخداعك!
سعاد :
ازاي يا محمود تقول كده؟ أنا عمري ما كدبت عليك يا محمود! أنا ضحيت بأهلي وبكل حاجة واتجوزتك يا محمود! (محمود في ثورة جنونية.)
محمود :
إنتي السبب في عذابي وإدماني. إنتي اللي ضيعت حياتي ومستقبلي! أنت عمرك ما حبتيني وأنا كنت باحس كده دايما. حطمتيني! قتلتيني يا خاينة! (يخبط بيده بقوة على المكتب.) (الطفل يهب من نومه مذعورا على الصوت. يبكي بصوت عال.) (صورة مكبرة لوجه سعاد ينم عن الألم الشديد والفجيعة. الدموع في عينيها متجمدة من الصدمة. الطفل يبكي بحرقة. سعاد تمشي ببطء وتذهب إليه لتحمله. محمود يدخل وراءها مسرعا في جنون.) (سعاد تحمل الطفل بين ذراعها لتهدئه. محمود ينظر إليها وإلى الطفل في جنون. وجه سعاد مكبرا ينم عن الخوف.)
محمود :
الولد ده ابن مين؟ (وجه سعاد مكبرا ينم عن الدهشة الشديدة والذهول.) (تتراجع إلى الوراء في خوف.) (محمود يقترب منها ومن الطفل ببطء.) (صورة مكبرة لعينية البارزتين في جنون.)
محمود :
مش ابني! مش ابني! يا خاينة! يا خاينة!
Unknown page