قطع الرحط والدخلة

جلس أمامي في بنبر كبير ود أمونة، كانت عيناه تشعان بهجة وغموضا، ويبدو أنه يود أن يقول كلاما مهما، ولكنه يحتاج لمفتاح ما، وأعطيته إياه عندما سألته: في شنو؟

قال وقد مد ساقيه النظيفتين، وهما يلمعان في ضوء المصباح: إنت عارف أنا طالبك كم؟ قلت له مشجعا إياه على الكلام: كم؟

قال وهو يستخدم أصابع يديه في الحساب بطريقة طفولية، ويحرك عينيه في غواية نسوانية: ثلاثة جنيه ونص دي حطب الدخان والطلح، سمح؟ سبعة جنيه ونص دي حق الدلكة اشتريتا من أدي، سمح؟

خمستاشر جنيه بتاعة الصابون، وكلونيا الحمام، خمسة جنيه دا حق شغل الدلكة الأنا دلكتها ليها، حق يديني ديل، ومد يديه بطريقة بناتية لا تخلو من غنج، خمسة جنيه دي حقت شيل الجسم؛ والله شلت ليها أي شعرة في جسمها خليتها تلمع زي القمر، وح تشوف براك، والجنيهين ديل بتاعة صباع أمير، سمح؟

قلت مندهشا: صباع أمير بتاع شنو؟

قال وهو يضحك باستمتاع خاص: ح تلاقيه قدام، وح يعجبك.

قلت: إذن الحساب كله كم؟

قال مبتسما: خمسين، سبعين، جنيه كدا، سمح؟

أعطيته مائة جنيه، أعد بسرعة البرق الشيشة، عرض علي أن يدلك جسمي بالدلكة مجانا، أو ينظف ملايني فاعتذرت بأدب، قام بتغيير الملاءات وأحضر لبنا، وحساء، وعصير كركدي، أعد أدوات صنع القهوة، أحضر مسجلا كبيرا بسماعتين خارجيتين، فعل كل ذلك بسرعة، بهدوء، بإتقان وحرفية، قبل أن يقول لي: الحمام جاهز، الموية دافية، أخير تلحقها قبل ما تبرد.

Unknown page