متأكدين يعني؟
م1، م2، م3 :
تمام التأكد، زي ما إحنا شايفين سيادتك كده. دي ما فيهاش أي كلام.
الدكتور (مخاطبا التليفون) :
إنت متأكد يا درش إنك بتقرأ من دفتر 65؟ راجع تاني ... مرة تانية كمان ... كمان مرة تالتة عشان خاطري، كده؟ طيب. (يضع السماعة) .
الدكتور :
بقى الأول تكون هنا وتقولوا أبدا ما كنتش دي ميتة، وبعدين تقولوا إنها ماتت سنة 62، وبعدين تلاقيها متقيدة في نفس اليوم اللي قلتوا عليه بس سنة 65 (ثم فجأة بزعيق هائل)
النجدة. دا شيء أكتر من طاقتي. النجدة لغاية هنا وما اقدرشي. الحقونا، انجدونا يا بوليس النجدة، يا ناس (يرفع السماعة ويطلب بوليس النجدة)
آلو ... ادوني القائد ... القائد بنفسه ... أيوه ... أنا مفتش الصحة ... إلحقونا ... تعالوا لنا بسرعة ومعاكو قوة ... دا مش بلاغ واحد ... دا كوم بلاغات وجنايات. أنا في عرضكم. (فاصل موسيقي صوتي)
الحقونا (يضع السماعة) .
صفحة غير معروفة