لأ الظاهر يابا الحكاية المرة دي جد.
نصار :
جد في عينك! إيش عرفك انت بالإنجليز؟ اسألني أنا اشتغلت معاهم خمس سنين وأعرفهم كويس قوي، دول أكبر مهوشتية في العالم. أيام الحرب كنت باشتغل في ورشة في التل الكبير اسمها ال «فايف بي أو دي»، تعرف كانوا طول النهار بيشغلونا ف إيه؟ نعمل دبابات خشب وورق وندهنها بوية عشان يهوشوا بيها روميل. الإنذار بتاعهم دا ورق.
مسعد :
ما بيقولوا فيه أسطول كمان في البحر يابا، دا راخر ورق؟
نصار :
أمال؟ لازم يسبكوا التهويش، مهو حاكم تهويش عن تهويش يفرق ... فيه واحد يهوشك تفتكره جد، وفيه واحد يكلمك جد تفتكره تهويش ... أهو الإنجليز دول حركاتهم طول عمرها تهويش ومصيبتنا إننا بنفتكرها جد.
مسعد :
دا فيه ناس حتى شافت الأسطول بعينها.
نصار :
صفحة غير معروفة