السيرة مكونة من عشرين باربارا، خمسة لاندروفرات، باص همدائييت، وباص الشواك، لوري الحفيرة، تراكتور بمقطورة يتبع لأحد التجار من زهانة، المغني المتفرد ود أمونة، يصدح بصوت نسائي عليه بحة خفيفة، ربما نتيجة للسهر وتعليم العروس، وشرب القهوة الكثير في بيت العرس، حيث لا تنطفئ نار القهوة لما يزيد على الأسبوع، يتبعه كورس من الصبيات والنساء في حماس وإثارة.

علق أحد السماسرة في ضيق: الله يسخته، ما بتعرفو، مرا ولا راجل.

ضحكت عزيزة قائلة: دا ود أمونة وبس، هو كدا.

قال السمسار الآخر: دا زول مخنث ما نافع، والله لو ولدي كنت ح أكتلو عديل كدا.

قالت عزيزة: ما لك ومال الزول دا ربنا الخلقه عايزو كدا، ثم أضافت: إنتو عارفين محمد عوض اتزوج منو؟

قلت: لا، بالتأكيد.

قالت: اتزوج زينب بت أبرهيت الفلاشاوي.

قلت مندهشا: الفلاشاوي؟ يعني من الفلاشا.

قال أحد السماسرة: أيوا، وقالوا الفلاشا ديل يهود، هم ذاتهم الباعهم جعفر نميري لإسرائيل، مش كدا؟

قال جملته الأخيرة موجها كلامه إلى صديقي.

Bog aan la aqoon