والله يا بني أي شغلانة أحسن من دي، لو عملت بتلاته جنيه بس تقبضهم آخر الشهر لبأت عيشتنا ندا، لكن اللي بيجيلك يركبه ألف عفريت؛ بييجي مقطع وكل حين ومين تلاتين قرش، أربعين قرش، خمسين، ريال، تؤ (تهز رأسها)

ما يمكنش الأمور تدبر كده يا بني؛ أديني عايزة أدبأ إرشين أجيب بهم شوية زبدة وهي رخية أبل ما تشد، لكن منين؟! إللي باخده منك ترجع تاخده تاني: يا حاجة والنبي أنا معزوم أبصر فين، يا حاجة عايز سجاير، يا حاجة مش عارف راسي بتلف وصدري طابئ معاكيش قرشين أجيب بهم اسمها إيه؟ سفريتة.

حامد :

أسبرين، أسبرين.

الحاجة :

أنا عارفة؟ وايش كان دراني؟! لا كنا نعرف سفريتة ولا عفريتة، بس نفسي ربنا يصلح حالك ويسهل لك وتبأى الإرشين تديهم لي مجمدين على بعض، كتار قليلين أهو على أد الحال؛ علشان يا بني تيجي تلاقي لقمة كويسة، أنجدلك فرشك، البيت عايز كتير يا حامد ولا فيش حاجة.

حامد :

أنا راض يا حاجة بما قسم لي، وكل ما أرجو هو أن يطيل الله لي عمرك.

الحاجة :

عمري إيه وهباب إيه يا بني؟! وحاخد إيه من طولة العمر؟! وأنا عاملالك إيه يعني؟! غرش انا قلبي عليك، ويقول: القرش الابيض ينفع في النهار الاسود؛ أقولكش؟ طيب اديني كل يوم اللي تقدر عليه: إرش، إرشين، خمس أروش، الموجود، أشيلهم لك، مين عارف؟ أهو تبقى تلاقيهم إن حصل حاجة كده ولا كده، وكمان يا بني اللي معاه الإرش تبقى عينه قوية وقلبه جامد، أما اللي جيبه فاضي يا حسرة عليه؛ لا حد يقبل منه لا هنا ولا عزا؛ أهو أنا لما طلعت احج كنت وحدي، واسمي برده ولية، ولكن وحياة رحمة والدك كانوا رجالة بشنبات يخدموني خدمة العبد للسيد، ليه؟ علشان إرشي معاي، أمال! ولما رقدت واللي جاني جاني بقوا حواليه، تقولشي أنا أمهم؛ سهرانين جنبي، ما فاتونيش أبدا؛ بالدور؛ دا ينام ودا يصحى، لحد ربنا ما من بالعافية، لو كنت بأه منفضة وإيدي مش عليهم دايما كنت زماني مت واتلقحت زي الكلبة في السكة (تتنهد)

Bog aan la aqoon