قال وهو يبتلع جرعة ضخمة، ويدفع بحزمة كبيرة من الهواء خارج جوفه: كلنا مسلمون، ولكن شوية معصية من أجل الاستمتاع بالحياة والقبض على اللحظة ما فيها مشكلة. ثم أضاف: أنت عارفة يا سارة، لو شربت شوية وشعشعتي، وبعد داك مارسنا مع بعض حتعرفي قيمة الحب، ما في أجمل من الخمرة والجنس سوا، والجن بالذات بيهيج الزول.

قلت له من بين أسناني: أنا هنا سجينة وبس، وما عندي أي رغبة في شيء لا جنس ولا خمر، كل ما أحتاج ليه حريتي، عايزة أمشي بيتنا وبس.

قال بعد أن ابتلع جرعة أخرى: ولكن أنت مش اخترتي براك المكان دا؟

قلت له: أنا عايزة أكون حرة؟ الكهوف برضها سجن.

قال دون مبالاة، وكأنه يتحدث إلى طفلة: إن شاء الله قريبا جدا حتاخدي حريتك، وحنحتفل سوا بالمناسبة دي، بس اشربي شوية دواقة ما أكثر، بقة بقتين.

ومد لي الزجاجة فرفضتها وذهبت بعيدا في عمق الكهف تاركة إياه، كان يغني بصوت عال والغريب في الأمر كان يمتلك صوتا جميلا شجيا وهو يغني مقلدا صلاح الضي:

يا طير يا ماشي لأهلنا

بسراع وصل رسايلنا

أتيت إليه مهرولة على إثر سماع فرقعة الزجاجة على الحائط، قال: آسف، أنا لمان أكمل القزازة أحتفي بها بجدعها. انخلعت؟

ثم سألني بصوت سكير وهو يحرك يديه في الهواء: أنت عارفة صلاح دا قتله شنو؟ صلاح دا قتله الحب، كان أروش ما بيعرف يحب، والحب زي الحرب؛ عايز استراتيجية وتكتيك، صلاح كان لأ، أنا بعرفه، كان يرمي بنفسه في ميدان المعركة دفعة واحدة ثم يفكر في الهجوم أو الانسحاب. كنا سوا في ليبيا، غنينا وسكرنا ومدحنا، صلاح دا أحسن مداح في الدنيا، وأحسن زول خلقه ربنا في الزمن داك، آآآآآآآه، زمن والله ...

Bog aan la aqoon